GAGAMITIN na ng Philippine Red Cross simula bukas ang kanilang COVID-19 saliva test na una nang inaprubahan ng Department of Health.
Ayon kay Dr. Paulyn Ubial, head ng PRC biomolecular laboratories, magiging available ang saliva COVID-19 test nito sa molecular laboratories sa Mandaluyong City at Port Area sa Maynila.
Sa darating na Pebrero 5 naman ay target ng PRC na magkaroon ng saliva test sa lahat ng labing-tatlong molecular laboratories nito sa bansa.
Nagkakahalaga ng P2,000 ang saliva test ng PRC o mas mura sa gold standard na RT-PCR test.
Ayon sa PRC, ang resulta ng pagsusuri sa laway ng tao kung may COVID-19 virus o wala ay malalaman pagkatapos ng tatlong oras. Pero tatlumpung minuto bago magpasuri, hindi muna pupuwedeng uminom, magmumog, kumain, manigarilyo o kahit mag-vape ang kukuha ng saliva test.