LAGUNA-Pinaulanan ng bala ng dalawang di kilalang mga kalalakihan ang bahay ng isang mag-asawa kagabi sa bayan ng Magdalena, Laguna.
Nagtamo ng sugat sa kaliwang siko si Renato Batralo y Oriel, 31 anyos, habang ligtas naman ang asawa nito na ayaw na magpabanggit ng pangalan.
Ayon sa salaysay, bandang alas 10:25 ng gabi nitong Enero 28 habang nasa loob ng bahay ang mag-asawa ay may dalawang kalalakihan ang bigla na lamang pinagbabaril ang kanilang bahay sa Barangay Baanan, Magdalena.
Tumawag ang isang concerned citizen sa Magdalena MPS upang iulat ang nasabing pangyayari at ng beripikahin ng pulisya dito natagpuan ang biktimang nakadapa sa loob ng bahay .
May tama ng bala ng baril sa kaliwang siko si Batralo.
Agad na dinala ito sa Majayjay Medicare Center sa Laguna Provincial Hospital pati ang kanyang misis.
Sa ngayon ay nasa maayos na kundisyon na ang mag-asawa habang patuloy na nagiimbestiga naman na ang pulisya sa motibo ng mga suspek sa nasabing pamamaril sa mag-asawa.