CALAMBA CITY, LAGUNA–Nagbigay ng pahayag ang Philippine Institute of Volcanology and Seismology (Phivolcs) makaraang maiulat ang pagkatakot ng mga residente sa isang subdibisyon sa Los Banos Laguna ang paglalabas ng usok sa mga imburnal sa nasabing subdibisyon.
Sinabi ng Phivolcs na ang Mount Makiling ay isang inactive volcano kung kaya’t walang dapat ikabahalang sasabog ito.
Ayon sa kanilang FB post kaninang hapon, “Ang nakitang steaming ay mula sa hot springs katulad ng hot spring resorts na pinupuntahan sa Laguna. Ang hot springs ay normal na makikita sa mga bulkan.”
Ito ay kahalintulad sa mga nakikita sa mga hotspring resorts sa Pansol, Calamba, Laguna.
Matatandaan na nagulantang ang mga residente ng Lakewood Subdivision sa Brgy. Tadlac Los Banos nitong Huwebes ng umaga nang makitang umuusok ang ilang imburnal sa kanilang lugar kaya’t agad na binisita ni Mayor Tony Kalaw ang nasabing lugar.
Iniulat din kaagad ng lokal ng pamahalaan sa Phivolcs ang pangyayari upang malaman kung ano ang dahilan ng pag-usok nito.