Pag-iisipan pa at pag-aaralan pa umanong maigi ng Department of Health (DOH) ang anal swab test para sa COVID-19 infection kung ito ay talagang kakailanganin sa ating bansa.
Tugon ito ni DOH Usec. Maria Rosario Vergeire kaugnay sa lumabas na artikulo hinggil sa ginagawang anal swab test sa China.
Ayon kay Vergeire, hindi maginhawa o inconvenient sa parte ng isang indibidwal at health care workers ang nasabing pag-susuri.
Base kasi aniya sa lumabas na artikulo, ang virus ay nananatili ng mas matagal sa anus area kaysa sa respiratory tract.
Gayunman, ano man aniya ang lumabas sa mga artikulo kung papasok umano ang nasabing teknolohiya sa ating bansa ay dadaan pa rin ito sa validation na ginagawa ng ating national reference laboratory katulad ng ginagawa ng iba’t-ibang teknolohiya.
Isinasagawa ang validation study ng Research Institute for Tropical Medicine (RITM) ngunit kailangan pa umanong iparehistro sa Food and Drug Administration (FDA).
“Kung kami tatanungin sa DOH, kung talagang kakailanganin at with sufficient evidence at nakita na talagang makakapagbigay ng accurate results also, pag-iisipan pa ng maigi ng gobyerno ‘yan “ ayon pa kay Vergeire.
“As we said, it is really inconvenient to both individual and health care workers,” dagdag pa ng opisyal.
(Photo credit: globaltimes.cn)