NILINAW ng Commission on Elections (Comelec) na hindi pa iginagawad ang kontrata sa F2 Logistics upang mag-deploy ng mga kagamitan sa eleksyon, peripherals, forms, supply, paraphernalia at warehousing para sa halalan sa susunod na taon.
Sa isang pahayag, sinabi ni Comelec spokesperson James Jimenez na ang Parañaque City-based F2 Logistics Philippines Inc. ay idineklara lamang bilang “bidder na may pinakamababang kalkuladong bid” para sa P1.61 bilyong proyekto.
“F2 Logistics hasn’t been awarded the logistics contract. Since it submitted the lowest bid, it is now going through the post-qualification process, which hasn’t been completed yet,” pahayag ni Jimenez .
Kamakailan lamang ay inanunsyo ng Comelec Special Bids and Awards Committee (SBAC) na pinaboran ang tatlong kumpanya na kuwalipikado na mag-bid para sa proyekto.
Ang mga karapat-dapat na bidders ay ang LBC Express, Airspeed International, at 2GO Express, Inc.
Sa ilalim ng proyekto, ang mananalong bidder ay dapat responsable sa delivery at reverse logistics ng lahat ng automated election system-related equipment, peripherals, forms at supplies para sa darating na eleksyon.
Kasama sa mga equipment at supplies ang vote-counting machines, external batteries at accessories; consolidation o canvassing system machines; transmission equipment at devices; ballots; generator sets at iba pa.