Plano ng Lungsod ng Maynila na magkaroon ng 18 mga vaccination site sa lungsod para sa vaccination program ng pamahalaan laban sa COVID-19.
Sinabi ni Manila Mayor Francisco “Isko Moreno” Domagoso sa isinagawang mass simulation ng COVID- 19 vaccination sa Isabelo De Los Reyes Elementary School sa Tondo na 540,000 libo ang tatanggap ng bakuna kung magagawa ang kanilang target na bilang ng vaccination site.
Ayon pa sa alkalde, ito ay kung 18 libo kada araw ang maba-bakunahan at kung gagawin ang vaccination mula Lunes hanggang Linggo.
Ang simulation exercise aniya na ito ang pinakamalapit sa katotohanan dahil sa target ngayon na maserbisyuhan na isang libong volunteer.
Ito rin aniya ay bahagi ng paghahanda para sa gagawing vaccination program ng gobyerno sakaling dumating na sa bansa ang mga bakuna.
Aniya, hindi ordinaryo ang pagbabakuna na gagawin kaya mahalaga ang aktibidad lalo na at may ipinaiiral na health protocols kabilang ang social distancing.
Dagdag pa ng alkalde na iba-iba rin ang paraan sa pagtuturok ng bakuna depende sa gagamitin kaya’t kasama ito sa pinaghahandaan ng Manila Health Department at mga medical frontliners na katuwang nila sa vaccination program.