MAHIGPIT na nagpaalala ang Commission on Elections (Comelec) na labag sa batas ang vote buying subalit tiniyak na bibigyan ng “due process” ang mga kandidato na gagawa nito.
Ayon kay Comelec Spokesperson James Jimenez, maaaring kasuhan ng vote buying ang kandidato kahit na ikatwiran nito ang “humanitarian consideration.”
Gayunman, may “due process” na ipatutupad upang malaman ang tunay na intensyon ng isang kandidato sa pamimigay ng pera.
Samantala, nilinaw din ng Comelec na hindi maaring kasuhan ng vote buying si Sen. Manny Pacquiao na tumatakbo bilang Pangulo, matapos itong magtungo sa Batangas at namigay ng tig isang libong piso. Hindi ito vote buying dahil hindi pa naman nagsisimula ang campaign period, ayon sa Comelec.
Katwiran ni Pacquiao, hindi pa man siya tumatakbo sa pagka Pangulo ay namimigay na siya ng tulong mula sa sarili niyang pera.
Paliwanag pa ni Jimenez, ang pagbenta at pagbili ng boto kapalit ng pera ay kapwa ipinagbabawal sa ilalim ng Omnibus Electionn Code na may parusang pagkakakulong na aabot ng anim na taon, at habambuhay na pagkadiskwalipika sa paghawak sa anumang posisyon sa gobyerno.