NAGBABALA ang Valenzuela City LGU na muli nitong sususpindihin ang business permit ng North Luzon Expressway (NLEX) kung bigo pa ring maresolba ang mga reklamo sa cashless tollway system nito sa Pebrero 26.
Kanina ay nagpatawag si Valenzuela City Mayor Rex Gatchalian ng pulong ng technical working group kasama ang mga opisyal ng NLEX para ilatag ang mga reklamong natanggap nito sa nakalipas na linggo.
Sinabi ni Gatchalian na kung makatatanggap pa rin sila ng mga reklamo pagkatapos ng Pebrero 26 ay masususpindi muli ang business permit ng tollway operator.
Tinukoy ng alkalde na pare-pareho ang mga reklamo na kanilang patuloy na natatanggap hinggil sa palpak na RFID system at iba pang technical glitches sa toll plaza.
Binigyan na aniya nila ng sapat na panahon ang NLEX para ayusin ang system upgrade ng cashless system nito kaya’t dapat ay wala nang lulutang na katulad na isyu.
