TINANGGAP at inaprubahan ng House of Representatives ng buong-buo ang bersyon ng Senado hinggil sa panukalang paglibre ng buwis ng honoraria at allowances ng mga nagtrabaho sa panahon ng 2022 national at local elections.
Una nang pinagtibay ng mga senador ang Senate Bill 2530 na nag-aamyenda sa House Bill 9652 na layong baguhin ang Section 32(B)(7) ng National Internal Revenue Code of 1997 upang mabigyan ng tax exemption ang mga guro at iba pang nagtrabaho sa proseso ng eleksyon.
Ayon kay Albay Representative Joey Salceda, ang pangunahing may akda ng panukala sa Kamara, sa pamamagitan ng pagtanggap ng bersyon ng Senado ay hindi na kakailanganing dumaan sa Bicameral conference committee ang panukala at isasalang na lang sa paglalagda ni Pangulong Rodrigo Duterte.
“That way, we avoided the need for a bicameral conference committee since we are now of one and the same version,” ani Salceda.
“At just around P138.6 million in annualized revenue cost, which I think is very reasonable given the job well done, few exemptions are better deserved,” dagdag nito.
Sinabi ni Salceda na ang mabilis at maayos na proseso ng halalan nuong Mayo 9 ay bunga ng pagsisikap ng mga kumilos na poll workers.
“I am hopeful that PRRD (President Rodrigo Roa Duterte) will speedily act on the matter so that we do not need to withhold taxes anymore from the compensation. I think this will be in PRRD’s desk by this week,” pahayag pa ni Salceda.