Isang hinihinalang drug pusher ang patay nang manlaban sa mga awtoridad sa isang buy-bust operation sa Port Area, Manila kahapon ng madaling araw.
Dalawang tama ng bala sa dibdib ang ikinamatay ng suspek na nakilala lang sa alyas na “Popoy,” nasa edad na 35 hanggang 40-anyos, may taas na 5’5” at nakasuot ng kulay gray t-shirt at maong na pantalon.
Batay sa ulat ni PSSgt. Ross Cunanan ng Manila Police District (MPD)- Homicide section, nabatid na dakong 2:50 ng madaling araw nang magsagawa ng buy-bust operation ang mga tauhan ng MPD- Police Station 13 sa Block 15 – B, Baseco Compound, Port Area matapos na makatanggap ng tip hinggil sa ilegal na aktibidad ng suspek.
Gayunman, sa kasagsagan ng transaksiyon ay nakahalata ang suspek na pulis ang ka-deal sa shabu kaya’t bumunot ito ng baril at nanlaban.
Naunahan naman siya ng nakaalertong pulis at kaagad na nabaril sa dibdib, na nagresulta ng kanyang kamatayan.
Narekober ng mga awtoridad mula sa suspek ang P500 marked money, dalawang sachet ng hinihinalang shabu at isang .38 kalibre ng baril.