MARIING kinondena ng pamunuan ng Philippine Coast Guard (PCG) ang brutal na pagpatay sa isa nilang tauhan sa Dual, Pangasinan.
Kasabay nito, nagpahayag ng sinserong pakikiramay si PCG District Southern Tagalog Commander, CG Commodore Genito Basilio, sa pamilya ng biktima na si CG Apprentice Seaman (ASN) Angelo Martinez, 23 anyos, at nakatalaga sa PCG District Southern Tagalog.
“He will not be able to achieve his dreams and aspirations anymore as he was ruthlessly slayed by a still unknown gunman. Rest in peace, CG ASN Angelo Martinez. My snappy salute to you. Salamat sa serbisyo mo sa bayan, anak,” pahayag ni CG Commodore Basilio.
Nangyari umano ang pamamaril sa biktima noong Enero 11 pasado alas 11 ng gabi sa Barangay Paitan West Corner Bolaoen Road, Sual, Pangasinan.
Residente ng Bolaoen ang biktima at kausap ang suspek nang bigla siyang barilin sa kaliwang bahagi ng bibig.
Isang concerned citizen ang nakakita sa biktima na nakahandusay sa tabi ng kanyang motorsiklo sa pag-aakalang nasagasaan kaya agad nitong ipinagbigay-alam sa mga awtoridad.
Naisugod pa sa Primary Care Infirmary Facility sa Caoayan, Sual Pangasinan si Martinez ngunit idineklara na itong dead on arrival.
Patuloy naman ang hot pursuit operation ng Philippine National Police laban sa suspek habang ang PCG naman ay nagsasagawa ng hiwalay na imbestigasyon kaugnay sa insidente.