DAPAT na umanong ipatigil ng national government ang pagpapasuot ng face shield sa lahat ng lalabas sa mga pampublikong lugar upang mabawasan ang gastusin ng taumbayan.
Ito ang suhestyon ni Manila Mayor Francisco Domagoso at dapat umanong sa mga ospital na lamang nirerequire ang pagsusuot ng face shield.
Ayon sa alkalde, tayo na lamang umano ang bansa sa buong mundo na nagrerequire ng pagsusuot ng face shield.
“Ang face shield ay dapat ipatigil nang irequire sa general population at gamitin na lang sa mga ospital upang makabawas sa gastusin at intindihin ng taumbayan. Dapat pag-isipan uli ito. Marami na tayong natutunan. We should adjust,” ani Domagoso.
Magugunitang ipinag-utos ng Inter Agency Task Force on Emerging Infectious Diseases (IATF) ang pagsusuot ng face shield sa lahat ng lalabas ng kanilang mga bahay.
Sa unang resolusyon ng IATF, nirequire lang ang pagsusuot ng face shield sa lahat ng papasok ng commercial establishments subalit binago ito at ipinag-utos ang pagsusuot ng face shield sa lahat ng lalabas ng bahay.