CAVITE — Ang pagdiriwang sana ng Valentine’s Day ng mag-asawa ay nauwi sa trahedya nang ang angkas na babae sa isang motorsiklo ay aksidenteng tumilapon patungo sa harapan ng isang gas tanker sa Tagaytay.
Agad na namatay ang babae na naka-angkas sa motorsiklo na minamaneho ng kanyang asawa at tumilapon papunta sa tanker.
Patungo sana ang dalawa sa Tagaytay upang ipagdiwang ang Araw ng mga Puso.
Minamaneho ni Mario Nilo Piamonte y Hilhang, 26 anyos, ang motorsiklo angkas ang asawa nitong si Judy Ann Piamonte y Sabos, na residente ng Manggahan, General Trias City sa Cavite.
Nang sumapit sa General Trias – Amadeo paakyat ng Tagaytay ang mag-asawa, naisip ni Mario na mag-overtake sa bandang kanan ng gas tanker na nasa kanilang harapan at pinasok ang parehong direksyon na tinatahak ng nasabing tanker sa Barangay Loma.
Tumama ang gulong ng kanilang sinasakyan sa konkretong bato at nawalan ng kontrol ang kanilang manibela, sabay tumilapon ang biktima sa harapan ng 10-wheeler truck.
Nagulungan ng gitnang gulong ng truck ang biktimang si Judy Ann na nagresulta ng kanyang agarang pagkamatay.
Kusang loob namang sumuko sa mga awtoridad ang truck driver na si Rolando Obsioma y Macalaquing, 49 anyos at residente ng Barangay Bagtas, Tanza matapos ang aksidente.