Inaalam na ng pamunuan ng Manila Police District (MPD) ang ugat ng pagkalat ng infection ng COVID-19 sa kanilang hanay.
Kasunod ito ng pagiging positibo sa sakit ng 46 nitong tauhan sa MPD-Station 11 na sakop ng Binondo sa Maynila.
Sa kumpirmasyon ni MPD Chief Brig. General Leo Francisco, dalawang police personnel mula sa nasabing bilang ang nasa ospital at isa ang severe case habang papagaling na ang iba.
Naitala naman ang mga kaso simula Marso 3 hanggang 13.
Ayon pa kay Francisco, mayroon pang 87 na pulis ang hindi pa naisasalang sa swab test kaya’t nababahala siyang tumaas pa ang bilang ng kaso ng kapulisan sa Maynila.
Alas 5 kahapon ng isailalim sa special quarantine lockdown ang MPD-PS 11.