ISANG motion for reconsideration ang planong ihain ni dating Caloocan Representative Edgar Erice sa Commission on Elections (Comelec) sa desisyon ng pagdiskwalipika sa kanya para sa 2025 elections.
Sa isang press conference, sinabi ni Erice na diniskwalipika siya dahil nairita ang poll body sa kanyang pagpupursige.
Nitong Miyerkules, pinagbigyan ang petisyon na humihiling na idiskwalipika si Erice dahil sa pagpapakalat ng maling impormasyon sa kontrata ng Comelec sa South Korean firm Miru Systems, Inc.
Si Raymond Salipot ang tumayong petitioner laban kay Erice sa nasabing disqualification petition. Ayon dito, nilabag ng mambabatas ang Section 261 ng Omnibus Election Code (OEC) dahil sa pagpapalaganap ng walang katibayan ngunit nakakagambala at nakakapinsalang pahayag laban sa Comelec at sa darating na eleksyon sa iba’t-ibang pahayagan, TV at radyo.
“All statements made by Respondent contradict verifiable and widely available facts from the Comelec and all sources across platforms,” saad sa desisyon ng Comelec.