Nagsagawa ng “pork holiday” ang nasa 17 pampublikong pamilihan sa Maynila bilang pakikiisa sa panawagan na maibaba ang presyo ng baboy.
Unang nang ikinasa ng mga meat vendor sa Paco Market ang kanilang holiday kung saan tumigil muna sila sa pagtitinda ng lahat ng uri ng karne tulad ng baboy, manok, baka, kalabaw, maging ang mga frozen products.
Sa pahayag ni Proscilla Romanes., opisyal ng Paco Market Vendors Association, hindi nila kakayanin ang ibinigay na P270 na price ceiling sa karne ng baboy dahil ang kanilang ipinupuhunan ay P300 na kada kilo.
Kapag hindi aniya sila mapagbigyan ay maaaring hindi pa rin sila magtitinda bukas.
Samantala, sinabi naman sa Manila Public Information Office na nakiisa na rin ang iba pang pampublikong pamilihan ayon na rin sa kumpirmasyon ni Manila Market Administration Office Director Zenaida Mapoy.
Bagama’t mayroon pa umanong nagtinda ng karne kaninang umaga sa San Andres Market at Quinta Market ay pinaubos lamang umano ang natitira nilang stock at sila ay nag-holiday din.