Breaking News

Share this information:

NASA malubhang kalagayan ngayon ang isang 17-anyos na estudyante matapos itong barilin ng tatlong teenager makaraang magsagupa ang dalawang magkalabang mga gang sa Malabon City.

Isinugod ang biktima ng kanyang ina sa Tondo Medical Center subalit kalaunan ay inilipat sa Philippine Orthopedic Center kung saan patuloy na ginagamot ang biktima na itinago sa pangalang “Randy” ng Navotas City.

Ipinag-utos naman ni Malabon police chief P/Col. Albert Barot kay Sub-Station 5 commander P/Lt. Zoilo Arquillo ang manhunt operation kontra sa mga suspek na sina Albert Lozano, Ayan Calidro, kapwa ng Blk 13 Hiwas St. Dagat-dagatan, Brgy. Longos at Deniel Soria ng Sawata St., Caloocan city.

Ayon kay Malabon police homicide investigator P/SSgt. Diego Ngippol, naganap ang insidente sa kahabaan ng Hiwas St. Brgy. Longos, matapos ang mga magkalabang gang na Original Batang Tondo (OBT) at Stoke Fam (SF) ay magsagupa dakong alas-4 ng madaling araw.

Sa pahayag sa pulisya ng mga nakasaksi, magkakasunod na nagpaputok ng kanilang pen gun ang tatlong suspek na miyembro ng SF gang patungo sa biktima na isang miyembro ng OBT.

Nang mapansin ng dalawang grupo ang presensya ng rumespondeng mga pulis at opisyal ng barangay ay mabilis nagpulasan ang mga ito sa magkahiwalay na direksyon habang naiwan naman ang duguang biktima.

Leave a Reply

This site uses Akismet to reduce spam. Learn how your comment data is processed.

%d bloggers like this: