Lima ang iniulat na patay sa naganap na sunog sa kasagsagan ng kasarapan ng tulog sa 662 Area F, Gate 20, Parola Compound, Tondo, Maynila magha=hating gabi ng Sabado.
Ayon sa ulat, kinilala ang mga nasawi na sina Jake Loyola, 37 anyos; Noah Loyola, 3 anyos; Richard Tigas; 10 anyos; Kiefer Loyola, 8 anyos, babae; at Jeric Tigas, 12 taong gulang.
Sugatan naman ang limang iba pa na sina Cyrus Frank, 9 taong gulang na nagtamo ng 2nd-degree burn; Sonny Boy Jovita, 23 anyos; Rea Adriatico, 37 anyos; Rodulfo Cadigal Jr., 44 anyos; at Marbin Alperes, 45 anyos, na kapwa nagtamo ng mga sugat.
Napag-alaman na nagsimula ang sunog bandang alas 11:53 ng gabi sa ikalawang palapag ng bahay ng pamilya ni Jake Loyola.
Gawa umano sa kahoy ang bahay kaya mabilis na kumalat ang apoy na gumapang sa iba pang kabahayan.
Umabot ang sunog sa ika apat na alarma dahilan para ma-trap at hindi na makalabas pa ang mga nasawi sa sunog.
Nasa 600 pamilya naman ang nawalan ng tirahan sa sunog na idineklarang fire out pasado alas 6 ng umaga ng Linggo.