APAT ang patay kabilang ang isang dating alkalde sa bayan ng Lasam sa Cagayan, matapos paulanan ng mga bala ang kanilang sinasakyang van ng hindi pa matukoy na bilang na mga salarin kahapon, araw ng Lunes, Pebrero, 15, 2021.
Hindi na umabot ng buhay habang isinusugod sa ospital si Lasam Municipal Councilor Marjorie Salazar at isa pang konsehal na si Eduardo Asuten, kanilang mga tauhan na sina John Rey Apil, driver at sekretaryang si Aiza Manuel.
Ayon sa report kay Lasam acting police chief Major Pablo Tumbali, sakay ang mga biktima sa puting Toyota Hi-Ace van nang sila ay sundan at pagbabarilin ng mga suspek pagsapit sa national highway, Barangay Ignacio B. Jurado pasado alas 11 ng tanghali.
Sinasabing lulan ang grupo ng armadong kalalakihan sa isang asul na Hyundai Accent at puting Toyota Wigo na mabilis na naghiwalay matapos ang kanilang pagtakas.
Una rito, napag-alaman na si Salazar ay isa sa mga pinangalanan ni Pangulong Rodrigo Duterte sa listahan ng “narcolist” bilang umanoy ‘protektor’ ng ilegal na droga sa kanyang bayan noong naglilingkod pa ito bilang alkalde.
Habang si Asuten, Apil at Manuel ay nadamay lamang sa insidente. Patuloy pa ang pagtukoy ng mga awtoridad sa mga nasa likod ng pananambang sa mga biktima