NAILIPAT na nitong Sabado sa Correctional Institution for Women (CIW) mula sa Pasig City Jail Women’s Dormitory si dating Bamban Mayor Alice Leal Guo at dalawa pang babae na kasama sa hinatulan ng reclusion perpepetua ng Pasig City Regional Trial Court (RTC) Branch 167 kaugnay sa Philippine Offshore Gaming Operation (POGO) sa Tarlac.
Ito ang kinumpirma ng Bureau of Corrections (BuCor).
Base sa ulat na isinumite kay Bucor Officer in Charge, Asec. Al Perreras ni CIW CT/SUPT Marjorie Ann Sanidad, nakasaad na alas 10:17 ng gabi ng Biyernes, Disyembre 5, sa Reception and Diagnostic Clinic (RDC) ng CIW si Guo, Jaimielyn Santos Cruz, at Rachelle Joan Malonzo Carreon, na ineskortan ng Bureau of Jail Management and Penology (BJMP) sa pamumuno ni Jail Chief Inspector Jean Olive Unciano, Warden ng BJMP Pasig City Jail Female Dormitory.
Sa bisa ng isang Mittimus Order na inisyu at nilagdaan ni Judge Annielyn B. Mendes-Cabels ng Regional Trial Court (RTC) Branch 167 ililipat ang tatlo sa CIW.
Sina Guo ay isasailalim sa 5 araw na quarantine bago ilipat sa regular na dormitory ng RDC sa loob ng 55 araw para sa mandatory orientation, diagnostics, at qualification.
Kapag nakumpleto na ang 60-araw na proseso sa RDC, ililipat ang mga ito sa kanilang nakatalagang regular na dormitoryo sa Maximum Security Camp.