NAHULOG na rin sa kamay ng batas ang ikatlong akusado sa nangyaring gang rape sa 14-anyos na estudyante sa Malabon City makaraang matunton ito sa kanyang pinagtaguang lugar sa Valenzeula City Sabado ng gabi.
Sa bisa ng warrant of arrest na inilabas ni Malabon Regional Trial Court (RTC) Judge Rhoda Magdalene Mapile-Osinada ng Branch 289, nadakip ng pinagsanib na puwersa ng Malabon Police Warrant and Subpoena Section (WSS) at Regional Mobile Force Battalion ng National Capital Region Police Office (RMFB-NCRPO), sa pangunguna ni P/Capt. Ronilo Aquino, ang akusadong si Benjamin Borromeo, 22 anyos, sa kanyang tinutuluyang bahay sa 1153 Orion St. Brgy. Malinta, Valenzuela City dakong alas-9:10 ng gabi.
Sa ulat ni P/CMSgt. Gilbert Bansil, hepe ng WSS, kay Malabon Police Chief P/Col. Albert Barot, natunton nila si Borromeo matapos makatanggap ng tip si P/Lt. Zoilo Arquillo, hepe ng Station Intelligence Section (SIS) mula sa kanilang impormante tungkol sa pinagtaguang lugar ng akusado na itinuturing na Most Wanted Person ng lungsod ng Malabon.
Batay sa rekord na ibinahagi sa media ni P/SMSgt. Addrich Reagan De Leon, isa sa mga arresting officers, naimbitahan at dumalo sa isang birthday party ang dalagitang biktima ng kanyang school mate na si Christ Angelo Dizon, 19 anyos, sa bahay nito sa Rosita St. Brgy. Santulan noong buwan ng Setyembre ng taong 2020.
Nahimok umanong uminom ng alak ang biktima at nang makaramdam ng pagkahilo, dito na siya halinhinang ginahasa ng mga suspek.
Nauna nang nadakip kamakailan sina Dizon at Joshua Dagohoy, 18 anyos, sa magkahiwalay na lugar sa mga lungsod ng Caloocan at Quezon ng mga tauhan din nina P/CMSgt. Bansil at Capt. Aquino hanggang sa tuluyang matunton na rin nila ang ikatlong akusado.