PINAKA-MAAAPEKTUHAN ang mga tatayong miyembro ng electoral board para sa Eleksyon 2022 sa ginawang pagtapyas ng Department of Budget and Management sa isinumiteng panukalang badyet ng Commission on Elections sa susunod na taon.
Inamin ito ni Comelec spokesperson James Jimenez na aniya’y ang malalim na pagtapyas ng DBM ay may malaking epekto sa 2022 national at local elections.
“The DBM’s deep cut into the Comelec’s proposed budget will significantly impact how the Comelec will conduct the 2022 National and Local Elections,” ayon kay Jimenez.
Aabot sa P42 bilyon ang inihirit na pondo ng Comelec sa taong 2022 pero ang inilaan lamang ng DBM na isinumite sa Kongreso ay nasa P26.5 bilyon.
“Even a cursory review of the National Expenditure Program, however, immediately reveals that the budget for the Electoral Boards will be one of the most affected,” dagdag pa ni Jimenez.
Gayunman, sinabi ni Jimenez na pinag-aaralan na ng Comelec kung paano ang magiging adjustments sa pondo nito.
Susubukan pa rin aniya ng Comelec na mabigyan ng sapat na pondo upang matiyak na magiging tapat, kapani-paniwala at may kredibilidad, maayos, mapayapa at ligtas ang eleksyon sa susunod na taon.