NANGANGAILANGAN pa ng karagdagang mga indibidwal sa bansa na maaaring sumalang sa clinical trial ng paggamit ng molnupiravir bilang prophylaxis o gamot para pigilan ang sakit matapos makasalamuha ng taong may COVID-19.
Sinabi nina Dr. Joel Santiaguel ng Quirino Memorial Medical Center at Dr. Benjamic Co ng Asian Hospital Medical Center na patuloy na umuusad ang Phase 3 ng MOV-e-AHEAD global clinical trial ng molnupiravir upang tukuyin kung magiging mabisa itong gamot sa mga taong nakasalamuha ng COVID-19 positive para mapigilang makaramdam ng sakit.
Katuwiran ni Dr. Co ay mahalagang mayroong gamot na hindi lamang makagagaling sa COVID-19 kundi makatutulong din kapag mayroong exposure dahil hindi naman isandaang porsyento ang bisa ng bakuna.
Partikular na puwedeng ma-enrol sa worldwide clinical trial na ito ay ang mga kasamahan sa bahay ng isang nagpostibo sa COVID-19 na wala pang bakuna o hindi nabakunahan pitong araw bago ang enrollment, walang COVID-19 o hindi pa tinamaan ng virus at edad labing-walo pataas.
Sa ngayon, sinabi ni Dr. Co na alinsunod sa compassionate special permit ng Food and Drug Administration ay maaari lamang maibigay ang molnupiravir sa mga taong may COVID-19 at hindi pa aprubado bilang post-exposure prophylaxis o gamot para hindi magkasakit ng COVID-19.
Nababawasan umano ng limampung porsyento ang insidente ng hospitalization o pagkamatay sa limang araw na treatment regimen ng molnupiravir para sa mga pasyenteng may mild hanggang moderate COVID-19.