BINATIKOS kamakailan ni Bureau of Immigration (BI) Commissioner Norman Tansingco ang mga kumakalat na maling impormasyon sa social media.
Partikular dito ang ilang kumakalat na mga video sa Tiktok kung saan hinihikayat ang mga Pilipino na maghanap ng trabaho sa ibang bansa bilang turista at ang karapatan nilang bumiyahe.
“These videos spread misinformation that might cause aspiring workers to be illegally recruited or trafficked,” ayon kay Tansingco.
Tinutukoy nito na ilang biktima na tinangkang pumunta sa ibang bansa bilang mga turista sa paniwalang makakapagtrabaho sila na walang haharaping problema.
“Tiktok videos without proper context may cause confusion to the public,” ayon kay Tansingco. “Apart from being part of the IACAT, it is the role of the BI to ensure that departing Filipinos are properly documented, based on their actual purpose of travel,” dagdag pa nito.
Ang IACAT o Inter-Agency Council Against Trafficking ay binubuo ng iba’t-ibang mga ahensiya ng gobyerno na inatasan upang labanan ang trafficking at illegal recruitment kung saan ang BI ang tinaguriang “last line of defense.”
Ibinahagi ni Tansingco na ang trabaho ng BI laban sa trafficking ay inaprubahan ng Supreme Court, isa dito ang 2021 na desisyon laban sa isang court employee na nalimutan na kumuha ng authority to travel.
Sa isang video ng isang legal practitioner, pinaalalahanan na ang basis requirements upang makapagbiyahe ay ang kanilang passport, visa kung kinakailangan at round-trip ticket. Gayunman, kung may nakitang problema, pinapayagan ang mga secondary requirements.
Ito rin ang nakalagay sa Memorandum Circular No. 036 ng Department of Justice sa IACAT guidelines ng departure formalities para sa international-bound passengers.
Nagbabala naman si Tansingco sa mga traffickers na makukulong sila ng maximum na 40 taon.
“Those who abuse social media to recruit and traffic Filipinos are being monitored already by local law enforcement agencies. The IACAT is very active in arresting and prosecuting recruiters, so your days are numbered,” babala ng BI Chief.