Nagbabala ang Department of Health (DOH) sa mga doktor tungkol sa “off-label prescription” o ang pagrereseta ng ivermectin sa kanilang mga pasyente, bilang panlunas sa COVID-19.
Ayon kay DOH Undersecretary Maria Rosario Vergeire, ang inisyung Certificate of Product Registration (CPR) ng Food and Drug Administration (FDA) para sa ivermectin ay bilang anti-nematode drug lamang at hindi gamot sa virus.
Ang nematode ay isang uri ng parasitic worm.
Babala niya, maaaring managot ang isang doktor kung irereseta niya ang ivermectin sa kanyang pasyente bilang panlunas sa COVID-19.
Nauna rito, kinumpirma ni FDA Director General Eric Domingo nitong Biyernes ng hapon na binigyan na nila ng CPR ang Lloyd Laboratories para sa paggawa at pagbebenta ng human-grade ivermectin ngunit bilang anti-nematode drug lamang.
Sinabi naman ni Vergeire na, “Kung sakaling gagamitin ‘yang ivermectin ng ibang mga doktor [for other purposes], it’s going to be an off-label use and ang accountability and liability will be resting upon the physician who has prescribed this.”
Matatandaang ilang government officials ang nagsabing ginagamit nila ang ivermectin para sa treatment at prevention ng COVID-19.
Gayunman, tutol dito ang FDA at DOH dahil wala pa naman anilang sapat na patunay na nakakapatay ito ng virus at ginagamit lamang itong pamurga sa mga hayop.
Mismong si Presidente Rodrigo Duterte naman na ang nag-utos na magsagawa ng clinical trial sa ivermectin upang mapatunayan kung maaari nga ba itong gamitin sa mga pasyente ng COVID-19.
Inaasahan naman na masisimulan na ng Department of Science and Technology (DOST) ang naturang clinical trial sa pagtatapos ng buwang ito o unang bahagi ng Hunyo.
Sa ngayon, may anim na pagamutan na sa bansa ang inisyuhan ng FDA ng compassionate special permits (CSP) para magamit ang ivermectin sa paglunas ng kanilang COVID-19 patients.